Enjoy Cours كيفاش تفاليدي في لافاك بنقطة زوينة

كيفاش تفاليدي في لافاك بنقطة زوينة

20 Jul

2019

كيفاش تفاليدي في لافاك بنقطة زوينة

 

السلام عليكم .. الا كنتي طالب سواء قديم و لا اول عام ليك ف لافاك .. هبط قرا هادشي غاينفعك بزاااف و صبر واخا شوية طويل لكن كون اكيد غاتكون درتي واحد القيمة مضافة .. 
------------------------------------------------------------------------------------

1- من البدية تاع السوميستر كا نقلب على جميع ليكزامانات لي فاتو فجميع الموديلات. علاش ؟ لأن الأساتذة الجامعيين ( من دون تعميم، كاين الله يعمرها دار) كا يعاودو الإمتحانات كيما كا يعاودو البوليكوب، كل عام كا يجي يغير فيه غير السنة الدراسية، ما كاين لا تجديد و لا تنقيح ولا تطوير. نصحتك بهادي كخُطوة أولي للأسباب التالية : - أولا : غادي تختاصر الوقت و الطاقة و تعرف شنا هوما لي بارتي les parties لي كا يركزو عليهوم الأساتذة.و بالتالي غادي تدير الإمتحان كعامل مُوجه ليك فالخدمة. باش لي كا تحط فالإمتحان تقراها، و لي ما كا تحطش تمزقها كل مُمزق. - ثانيا : غادي تفوكيسي أو تسيبلي (تركز) على المعقول. بمعنى غادي توجه الطاقة ديالك على الستونات لي داير عليهوم الفيلم ديال النقطة الواعرة. 2- ملي تبدا تقرا الكور غادي تركز على الكلمات و العبارات المهمة les mots clés لي مذكورين بزاف فليكزامان، و غادي تماركيهوم بالقلم الفوسفوري باش تضبطهوم مزيان. 3- غادي تبدا مُباشرة تحاول تخدم ليكزامانات من البدية تاع العام، أي شابيتر شرحو البروف أو فهمتيه غا دوز للتطبيق فالإمتحان. بهاد الطريقة غادي تكون غادي فالطريق الصحيح نحو أفضل نُقطة. #فحالة_حصلتي_فشي_إمتحان و ما لقيتيش الفقرة من الكور لي تساعدك باش تحلو، غادي تدوز للكُتب ديال تمارين و حُلول و لي هوما السر الأعظم ديال النقط الواعرين. بمعنى غادي تشوف شي تمرين لي كا يشبه ليه.
- تمارين و حُلول : من مورا ما تقلب على جميع ليكزامانات لي فاتو، غادي تدوز لكُتب تمارين و حلول لي غا تقلب عليهوم بأي طريقة. واخا تعرف تسافر عليهوم. و ملي تلقاهوم ما غا طيحش عليهوم كي الدابة، غادي تخدم فيهوم و فقط دوك التمارن لي كا يشبهو ل ليكزامان، و لي هضر عليهوم البروف فالكور. و هنا غا نصحك أ نرشدك أ جمي لواحد الدرس من أجود الدروس لي تعلمتها فحياتي و فطول المسيرة الدراسية ديالي و لي هو : #قانون_قلب_شقلب : لي تعلمتو من أتاي، حيتاش إلى ما قلبتيهش ما كا يجيش مداقو بنين. بمعنى أن أغلب الطلبة كا يحاولو يفهمو الكور عاد يدوزو للتمارن. نتا غادي تقرا الكور بلا ما تصدع راسك تفهمو، لأنك إلى درتيها غا تعصب و تمحن و تصدق سالطو مع لرض و خارج دور، نتا غادي تقراه قراءة عادية و غا تصطر على العناوين المهمة و الفقرات المهمة، و غا دوز نيشان لتمارين و حُلول تقلب على التطبيقات. بمعنى غادي تحاول تفهم الكور إنطلاقا من التمارن، و ماشي العكسسس. ضرب الماكس ديال التمارن بتوجيه من الفقرات المهمة فالكور، حتى تضرب شي عشرة ديال التمارن على الأقل أو على حساب، و من بعد دوز للكور غا تلقا راسك حفضتيه باللاشُعور. تأمل معايا مزيان : واش يمكن ليك تتعلم العومان بالقراية تاع الكور ؟ أو كتاب كيف تُصبح سباحا ماهرا في سبعة أيام، و من بعد غا تلاح للابيسين و غا تا تغرق. أحسن طريقة تتعلم بيها العومان هي الإحتكاك مع الما، بمعنى غادي تلاح فشي بلاصة ما غارقاش، و غا تبقا تخشي راسك و تشرب الما، و تخربق و تخلي الما يهزك، بمعنى غادي تمرن، حتى تولي كا تعرف تعوم لاشُعوريا. هادشي دكرتو لأن أحسن طريقة لفهم الكور هي إدمان التمارن، لي زيكزيرسيس . كا نقولها و نعاودها.
5- كيفاش ندير مع المواد ديال الحفاضة ؟ أي مادة كا تحفض غادي نسجلها فmp3 أو تيليفون ، و نغنيها أنا مع المزيكة لي كا طربني، و نبقا نتمزك ليها فطريق لاففاك و خاصة خاصة قبل ما تنعس، لاُن الذاكرة ديالك كا تكون عندها فاعلية كبيرة و دماغك فديك اللحضة كا يكون كا يخزن الأفكار، بمعنى غادي تجيبها هي هاديك. وهنا تفكرت ننصحك بواحد الحديث ديال : "من مات على شيء بُعث عليه" أنا كا نقول ليه " من نام على شيء إستيقظ عليه " بمعنى إلى نعستي و نتا كا تقرا، غادي تفيق و نتا مشهي القراية. با ختصار : حاول ديما تختم نهارك بالقراية. 6- التوازن L'équilibre : من أجود الحكم لي قريت فحياتي هي وحدة فكتاب priorité aux priorités ديال ستيفن كوفي Steven covey : التوازن فكلمة "و" (عطف عبارة) و ماشي فكلمة "أو" (فصل عبارة) l'équilibre se trouve dans le "ET" pas dans le " OU" , و التوازن قانون من أجمل قوانين الطبيعة، و حتى فالكيمياء كاين قانون التوازن ديال لو شاتوليي لي كا يبرهن على أنك كل ما حاولتي تضغط على التفاعُل يمشي فمحني مُعين كا يوقع العكس. بمعنى إلا مشيتي ضغطتي على راسك كتر من الحد باش تمشي غير فاتجاه القراية غادي تطيح فقاعدة " الضغط يولد الإنفجار" . #لي_بغيت_نوصل_ليك : هو ديرهوم بسطاش، قرا و مارس الرياضة،نوض جري مع الصباح، لعب كورا و عطي لكل ذي حق حقه، ولا غادي يعطيوك لكل دق دقهُ. قرا و لعب و نشط غير هو وقت القراية قراية، و وقت النشاط نشاط. 7- التركيز la concentration : هنا غا نسولك أ جمي، حيتاش على حساب تجربتي مع الطلبة أنواع : - كاين لي عندو تركيز تناقصي : بمعنى ملي كا يهز يقرا، الوقت كا يدوز و التركيز كا ينقص حتى كا يلقا راسو ناعس فوق البوليكوب، هاد خونا خاصو يغتانم البدية فقراءة الموديلات الصعبة، هو غادي و هو كا يهبط فالنيفو ديال الصعوبية باش يجيبها فنفس منحى تغير التركيز (دالة تناقصية). - كاين لي عندو تركيز تزايُدي : هاد خونا داير بحال العافيا ما حدك كا تزيدها العواد (الوقت) و هي كا تزيد تزند، هاد الساط خاصو يبدا بالموديلات السهلة، باش يمشي فنفس منحى التركيز، و يستاغل التركيز الطالع فقراءة الموديلات الصعيبة لي كا تطلب تركيز أكثر.#حاس_بيك_باغي_تسولني : أنا ما كا نقدرش نركز أ خويا واش كاين شي حل ؟ الجواب : الموسيقى التحفيزية لي اليوتيوب عامر بيها، يمكن ليك تقرا و نتا كا تمزك فنفس الوقت، هاد المزيكة غادي دير ليك رابط دهني فالمخ ديالك ما بين القراية و الموسيقى، لدرجة أنك ملي تسمع غير الموسيقى بوحدها غا تشهى القراية. و شخصيا ملي كا نبغي نطيح على القراية، كا نخشي ليزيات فودني و ما كا نحس براسي حتى كا نلقا 4 سوايع دازو و أنا كا نحرف . ثالث حاجة لي نصحك بيها : الشاي بالنعناع، أو القهوة كحلة ، او فيتامين c أو عصير الليمون هادو كلوهوم كا يطيرو النعاس.
8- الرياضة sport : و أحسن رياضة فالعالم هي السبور sport بمعنى خاصك تبقا تنوض تجري مع الصباح و تلعب كورا و تمشي لاصان و تمارس أي رياضة ، و العقل السليم في الكسدة السليمة (استثناء ستيفن هاوكينج و خوتو)، و الرياضة كا تنشط الدورة الدموية و كا تخليك مركز و نشيط و آليز. و كا تحيد الستريس و الضغط و العيا و الإكتئاب ... 9- العمل الجماعي : le travail en équipe : تحت شعار : "إنما يأكلُ الذئب من الغنم القصي" النون فاليد و الراطراباج هوما الدياب، و الغنم هوما الطلبة، لي دار راسو نزق و بغا يقرا بوحدو يفهم بوحدو يفاليدو بوحدو كا ياكلو الديب. و حاول ديما تكون نتا هو البطل بالكروب، ديما نتا هو لي كا يخدم التمرين الأول و يشرحو للعشران الأول، و كون سخي و ما تخبي تا حاجة على صحابك، و ما نحتاجش نعاود نفكرك بالفرق بين copier و coller . 10- ملي تكون كا تقرا و يجيك النعاس نعس حتى تدير الإشباع saturation باش ملي تفيق تكون فايق بالمزيان و فقمة التركيز، و إذا كنت كا تقرا و نتا كا تقاتل مع النعاس غادي تصدق ما قاري ما والو ههه بمعنى لا قراية و لا نعاس، ما غا تشد حتى وحدة فيهوم. 11- قرا بالحوب amour ماشي بالضغط pression : بمعنى خلي اطماعك فالنجاح هي لي تحفزك،ماشي خوفك من الفشل، و دير فبالك أن الماضي و المستقبل أزمنة لا وُجود لها على أرض الواقع، هوما من بين الأشياء لي ختارعوها لي حاكمينا، باش يخليونا عايشين فسجن الماضي، و مرعوبين من شبح المستقبل. نسا عليك الماضي، و دبح الموستقبال بموس ماضي، و كون ناضي و عيش اللحضة. باللحضة غادي تصنع (ماضي ) واعر لي غا تفتاخر بيه، و غا تصنع حتى (مستقبل) وااعر و زااهر لي غا يخليك تعيش أسعد حياة، و درتهوم بين قوسين لأني كافر بيهوم كيما راني كافر بالزمن. و ما عندهوم حتى وُجود فالقاموس ديالي.
, 12- كون حمار : بمعنى ما تفلسفش بزاف، ركز على النقطة و أججل عليك المعرفة حتى لأوقات العطل، لان هاد ولاد الطحالب لي شادين التعليم، ما بغاوناش كائنات مُفكرة، بغاونا روبويات قادرة على تنفيد التعليمات. ركز على الكور و التيدي و لي زيكزام لي فاتو، و إلى بغيتي المعرفة بكل اعماق قلبك غا نصحك بنصيحة وحدة و هي : خرج من لاففاك . خرج من السجن الجامعي لي كا يركز على الحفض و الإتباع أكتر من التفكير و الإبداع، و في الإمتحان يُعز الطالب الآلي الحفاض و الطالب المفكر الفيلسوف يُهان. - ( اترك المدرسة قبل أن يتعفّن عقلك من التعرض لأنظمة التعليم والمناهج والدرجات ، انسى حفلات التخرج واذهب إلى المكتبة وامسك كتاب واقرأ وتعلم بنفسك إن كانت لديك الجرأة ! ) .. " Drop out of school before your mind rots from exposure to our mundane educational system. Forget about the Senior Prom, go to the library and educate yourself if you've got any guts " - Frank Zappa #واش_يمكن_ليا_نجمع_بيناتهوم ؟ بمعنى واش يمكن ليا نجيب النقطة و المعرفة فنفس الوقت ؟ الجواب : خويا و ختي لا بغيتو تجيبو النقطة كا نصحكوم تتخلاو على المعرفة و على أي حاجة لي غادي تعيق الحصول ديالكوم على نقط زوينة. بكل بساطة لأن المعرفة ماشي هي ديك ست شهور ديال القراية لي كا يكدبو علينا بيها فالعام، المعرفة هي نمط حياة mode de vie أو style of life المعرفة شي حاجة لي سنوات حياتنا ما غا تكفيهاش، و المعرفة تيتيزة حساسة بزاف، ما كا تبغيش لي يديرها طريق باش يوصل للعاقة و العياقة، و لكن كا تبغي لي يضحي باللعاقة و العياقة من أجلها. و دير اللعاقة باش تقرا، ما تقراش باش دير لعاقة و التوازُن هو : - قرا مزيان و كون الأول ولا ترضى غير بالمركز الأول فلاففاك باش دير لعاقة. و ديك اللعاقة لي درتيها فلاففاك، ستاغلها باش تقرا فجامعة الحياة universety of life لي غالبا المُميزات لي كا يخليوك تكون ناجح فالحياة، كا يعرقلو ليك حياتك فلاففاك، بحال الفضول العلمي و التوجه و الهوس و حب الفن، و الفلسفة و التأمل و التدبر و السؤال. باختصار : كون حمار مؤقتا على ما تشد ديك الكارطونة و تخشي كرموستك مع الدولة. سينون : لا ما قديتيش تكون حمار، خرج من لاففاك و لي عندو باب واحد لايسدو عليه ، و أغنى أغنياء العالم حققو الثروة بالفريلانس خارج أسوار السجون الجامعية، عارف أنه ما كاينش شي واحد غا يوافقك الرأي لا درتيها، إلا أنا، و شي وحدين لي تخرجو من مدرسة المُعاناة. If you don't like where you are move you're not a tree.
- بكرهك للأستاذ prof غادي تجيبها فراسك و تضر راسك و ما غا ضرش البروف : بمعنى حاول ما تكرهش و ما تحقدش على الأساتذة، لانك لا شعوريا غا تنساق وراء كره المادة لي كا يقريو، و لا كرهتيها غا تطلع القالب فالتالي ديال العام. و بالتالي حاول تتقرب من الأستاذ و تبغيه بأي وسيلة باش ما يتأثرش الموديل ديالو، بمعنى غير فوجه الموديل. 14- ركز على الأسباب كتر من النتائج : بمعنى خلي تفكيرك يكون مسيبلي و مفوكيسي (موجه بدقة) على السبب لي غا يخليك تجيب أفضل النوقاط، وما تفكرش غير فالنوقاط، و إلى إذا بديتي تفكر غا تولي عايش فالأحلام و الأوهام حتى تبقا سيمانة ليكزامان و غا تلقا راسك غير كا تحلم تجي نتا الأول و ما درتي تا لعبة. الموهيم ركز على السبب لي هو إدمان التمارين المحلولة كا نقولها و نعاودها، إيييه محلولة، باش تعرف راسك آش كا دير و فين غادي و يكون عندك معيار باش تتيقن من صحة الأجوبة ديالك و بالطريقة لي كا يبغي البروف. أصلا الأساتذة من تمارين و حلول مناش كا يهزو نيت. 15- خوي الستيلو : ديما كتب و كتب و كتب و عاود كتب، ملي كنت كا نبريباري للإجازة فكلية العلوم و التقنيات بالرشيدية نيت ههه ما كنتش كا نشوف راسي شحال قريت من ساعة، كنت كا نشوف شحال من ستيلو خويت و شحال من تمرين كويت. وشي مرات ملي كا يوصل الستيلو للنص ديالو، كا نحلف إيما نهز الضاوية على الكرسي حتى يسالي و ما تبقاشي فيه جغمة ديال المداد، إيييه أ خاي فؤاد. 16- طبقا لمبادئ المنطق لي قرينا فالزيزيام، الناس جوج نواع، كاين لي كا يخدم بعطف عبارة "و" و كاين لي كا يخدم بفصل " أو". بمعنى كاين لي قدر يتكونيكطا و يقرا. و كاين لي قدر يتكونيكطا و مايقرا. سو : إذا كنتي من النوع لي الفيسبوك كا يليهيك على قرياتك سدو فمرة. و تفرغ للحرف. سينون راك عارف تنضم وقتك. 17-والله و لا قفلتي،لا فورتي : أو على الطريقة الأمريكية No gain No pain لي هي الشعار ديال الحدادة دكمال الأجسام لي كا يطلعو بيها الجسم المطراسي، ألور : حتى نتا لا بغيتي تجيب نقطة واعرة خاصك تعاني و تعاني، و ديك المعاناة فيها مُتعة لأنك بيها غادي ترسم البسمة على أحب الناس لي قراب ليك و خاصة : الواليدين. و بيها غادي توصل لداكشي لي بغيتي. أ وتحسبُ المجد ثمرا أنت آكلُهُ ؟ بل لن تبلُغ المجد حتى تلعق الصبرا . 18- le bonheur ne diminue jamais lorsqu'il est partagé السعادة و العلم و المعرفة و تجارب الحياة ما عمرهوم كا ينقصو ملي كا تبارتاجيهوم مع الإنسانية، بالعكس كا يزيدو نور على نور، و بالتالي حاول أي حاجة فهمتيها، بارتاجيها مع صاحبك بكل سخاء و تطبيقا لفلسفة العطاء، الشجرة كا تعطيك لوكسيجين واخا ما عمرك سقيتيها، و البقرة كا تعطيك الحليب واخا ما عمرك شربتيها، حاول ديما تكون معطاء و تتقاسم داكشي لي فهمتيه و تعليمتيه مع خوتك، و هادا أعظم أسرار النجاح لي قلييييل لي طايح عليه. و زيد عليها عمي الإلكترون ملي كا ينتاقل من مُستوى لمُستوى كا يعطينا فوتون، و الضو عبارة عن فوتونات، بمعنى أن الإلكترون هو لي كا يعطيك الضو la lumière و ما عمرو فرعن أو من و عاق عليك انه عطاك الضو، بكل بساطة لأنهُ كان محتاج يعطي، و إلى ما عطاش غادي يفنا و يفنا معاه الكون كامل. هاكا صحا عليك خاصك تعطي و تبارتاجي، ولا ما عطيتيش غا تجيبها فراسك. و ما غا ضر حتى واحد، النبتة ملي كا تمتانع تعطي لوكسيجين كا تدبل و تموت. و إلى كنتي كا تحس براسك فيك الإكتئاب و باغي تنتاحر و تودع هاد العالم، عرف ان السبب هو الإمتناع ديالك عن العطاء و الإحتكار ديالك، منقول

Autre article du membre joundan

20 Jul

2019

motivation pour valider


شحال من واحد دار لافاك ونجح في حياتو ....فالوقت لي ...

Lire la suite

20 Jul

2019

comment valider tout les modules dans la faculté

 

لعل الكل منا ما إن وطئت قدمه الجامعة إلا و له...

Lire la suite

20 Jul

2019

كيفاش تفاليدي في لافاك بنقطة زوينة

 

السلام عليكم .. الا كنتي طالب سواء قديم و لا ا...

Lire la suite

commentaires

Suivre nos nouveautés

Copyrights © 2018-2020 Enjoy Cours .Developped by JOUNDAN & ENNAOUI All rights reserved